یہ صابن میں نے خود آزمایا اور بہت سی خواتین کو بھی بتایا ہے‘  ہر قسم کے داغ دھبے دانے ختم ہوجاتے ہیں۔میرے چہرے پر تو خون اور گندی پیپ والے دانے نکل آئے تھے مگر اس صابن کو جب گھر پر تیار اور استعمال کیا تو چہرہ صاف ستھرا ہوگیا۔ ھوالشافی: کالی ہریڑ‘ سنڈھ‘ ملٹھی‘ نوشادر (یہ تمام چیزیں ایک ایک ماشہ)‘ ہرمل کے بیج دو سے چار دانے‘ کوڑتمہ (حنظل) اور کوئی بھی باتھ سوپ۔ طریقہ: اگر چار صابن کی ٹکیاں ہیں تو دو کوڑتمے ڈالنے ہیں‘ اگر دو صابن کی ٹکیاں ہیں تو ایک کوڑتمہ ڈالنا ہوگا۔ باقی چیزیں بھی کم زیادہ کرلیں۔ پہلے والی تمام اشیاء کا سفوف بنالیں پھر ان کو کسی برتن میں (سب اشیاء کو) ڈال کر ہلکی آنچ پر پکاتے جائیں‘ جب صابن کی ٹکیاں ڈالیں وہ باریک کتر کر ڈالنی ہیں ثابت صابن نہیں گلے گا تو پہلے صابن کو باریک باریک کتر لینا ہے۔ چمچ برابرچلاتے جائیں کسٹرڈ ٹائپ بن جائے گا‘ چمچ مسلسل ہلانا پڑتی ہے کہ برتن کے پیندے پر لگ نہ جائے۔ جب قدرے خشک ہوجائے اور آپ کو محسوس ہو کہ اب صابن بن جائے گا تو کسی شاپر پر ٹھنڈا ہونے کے بعد پھیلادیں اور اپنی مرضی کے مطابق سانچہ دے دیں۔ احتیاط: اس صابن کو شاپر میں ہی رکھنا ہے‘ کھلی جگہ پر صابن نہیں رکھنا‘ نہ دھوپ میں‘ استعمال کیلئے شاپر سے صابن نکالنا ہے ورنہ شاپر کامنہ بند ہی رکھنا ہے۔پائریا کا نسخہ:تمباکو دو تولہ‘ سونٹھ ایک تولہ‘ نمک سانبھر ایک تولہ‘ گیرو ایک تولہ‘ سپاری ایک تولہ۔ ان سب کو کوٹ چھان کر منجن بنالیں روزانہ دانتوں پر ملیں‘ رال بہائیں‘ دانتوں کی سیاہی‘ پیپ‘ درد‘ خون آتا ہو ان شاء اللہ ختم ہوجائے گا۔ (بنت نور محمد‘ کھوئیاں)

جو آرزو کر پوری ہوگی:
جو شخص ہر نماز کے بعد یَامَالِکُ الْمُلْکِ کو 212 مرتبہ تلاوت کرے‘ اللہ تعالیٰ اس کو اپنی رحمت میں لے لے‘ جو اس کو صبح و شام 716 مرتبہ پڑھے جوآرزو کرے وہ پوری ہو۔ ان شاء اللہ

کھانا فوری ہضم‘گیس ختم اور جسم ہلکا پھلکا کیجئے
ھوالشافی: سونف سو گرام‘ انار دانہ سو گرام‘ مصری سو گرام‘ سونٹھ سو گرام‘ ان چا ر چیزوں کو باریک پاؤڈر کی طرح پیس کر کسی بوتل میں محفوظ کریں‘ ہر کھانا کھانے کے بعد تقریباً آدھ گھنٹہ پہلے یا بعد میں ایک چمچ چائے والا پانی کے ساتھ کھالیں۔ کھانے کے بعد خوب ڈکار آئیں گے اور کھانا جلد ہضم ہوجائے گا ۔ پیٹ سے بادی گیس ختم کرکے پیٹ کو بھی ہلکا اور وزن بھی دن بدن کم ہوجاتا جائے گا۔ (حکیم ظاہر شاہ‘ حیدرآباد)